БИШКЕК, 12-дек — Sputnik. Брюсселде улуу жазуучу Чыңгыз Айтматовго арналган фотокөргөзмө ачылып, ага жазуучунун буга чейин эч жерде жарыяланбаган архивдик сүрөттөрү коюлду.
Көргөзмө ачылар алдында алп жазуучу Айтматовдун Европадагы жашоосу туурасында документалдуу кинотасма көрсөтүлүп, чыгармаларына жазылган музыкалар жаңырды. Эскерүү кечесине европалык айтматовтаануучулар, маданият ишмерлери, саясатчылар, дипломаттар, классиктин достору жана окурмандары катышты.
"Кыргыздарды жана Кыргызстанды дүйнө Айтматов аркылуу тааныды. Европада биздин таланттуу жердешибиздин чыгармаларын баалап, сүйүп окугандар арбын. Биз ал байланыштарды үзбөй, андан ары өнүктүрүшүбүз керек", — деди көргөзмөнүн уюштуруучуларынын бири "Улут Жүзү" коомдук фондусунун жетекчиси Рустам Маманов.
Көргөзмө Брюссель шаарындагы Россиялык маданият жана илим боюнча борбордо уюштурулду.
