БИШКЕК, 12-ноя — Sputnik. Казакстанда кармалып турган күйүүчү майдын алгачкы партиясы бүгүн Кыргызстанга келди. Бул тууралуу Кыргызстандын нефтетрейдерлер ассоциациясынан билдиришти.
Маалыматка ылайык, Кыргызстанга 41 вагон күйүүчү май өткөрүлдү. Ошондой эле, жакын арада бардык вагондорду Кыргызстанга өткөрүү тууралуу маселе чечиле турганын ассоциациядан белгилешти.
Эскертсек, Алмазбек Атамбаевдин Казакстанга болгон расмий иш сапарынын жыйынтыгында кыргыз-казак чек арасында кармалып турган 471 вагон күйүүчү майды Кыргызстанга өткөрүү боюнча да сүйлөшүүгө жетишилген эле.
Россиядан Кыргызстанга келе жаткан күйүүчү майдын документтери туура толтурулган эмес деген негиз менен ушул жылдын апрель айынан бери 471 вагон күйүүчү май Казакстандын "Луговое" станциясында кармалып турган болчу.
Нефтетрейдерлер ассоциациясынын маалыматы боюнча 2014-жылдын 10 айында Кыргызстанга 946 миң тонна нефтепродукт импорттолгон. Анын 508 миң тоннасы бензин, 438 миң тоннасы дизелдик отун. Андан сырткары ноябрь айынын башына алынган маалыматка ылайык, кампаларда сакталган күйүүчү майдын запасы 87 миң тоннаны түзгөн. Бул көлөм өлкөнү күйүүчү май менен туруктуу камсыздап турууга жетет.
