БИШКЕК, 8-ноя — Спутник Кыргызстан. Жогорку Кеңештин депутаты Элмира Жумалиева "Фабула" гезитинин 2014-жылдын 7-ноябрда чыккан санына маек берген. Депутат айым анда таластыктардын негизги көйгөйү болуп аткан төө буурчак тууралуу айтып, облус жетекчиси Койсун Курманалиеваны сынга алган.
"…Таластагы өкмөттүн өкүлү Койсун Курманалиева төө буурчак алабыз деп келген фирмалардын баарын жеке өзү көзөмөлдөйт деген имиштер жүрүп жатат. Мындан эки жума мурун килограммын 80 сомдон алабыз деп келишкен экен. Азыр элге 40 сомдон деп жатышат. Эл мунун баарын көрүп-билип турат. Быйыл түшүмдүүлүк начар. Үшүк албаса дагы кардын алдында калды. Карда калган төө буурчак сортун жоготту, саргайып калды", — дейт депутат айым.
Ал ошондой эле, өкмөт элге которуштуруп айдоо боюнча түшүндүрүү иштерин жүргүзүп, кайсыл продукцияны айдоо керектигин илимий жактан негиздеп бериши керек, — деп кошумчалаган.
