БИШКЕК, 8-ноя. — Sputnik. Бир катар дүйнөлүк саясатчылар Джо Байденди президенттик шайлоодогу жеңиши менен куттукташты.
Франциянын президенти Эммануэль Макрон Джо Байденди жана анын орун басары, вице-президент Камала Харристи кызмат орундары менен куттуктап, биргеликте иштешүүгө даяр экенин айткан.
Германиянын канцлери Ангела Меркель Байден менен Харриске ийгилик каалап, келечекте иш алып барууга кубанычта экенин билдирген.
АКШнын экс-мамлекеттик катчысы, президенттикке мурда талапкер болгон Хиллари Клинтон Джо Байден менен Камала Харристин жеңишин Америка үчүн жаңы барак деп атаган.
Улуу Британиянын премьер-министри Борис Жонсон дагы АКШнын өлкө башчысы менен орун басарын куттуктап, негизги өнөктөш болгон Америка менен иштешүүнүн маанилүү жактарын белгилеген.
Ал эми АКШнын мурдагы президенти Барак Обама Байден өз ишин бардык америкалыктардын кызыкчылыгы үчүн жасайт деген ишенимин билдирип, өлкөнүн ар бир жаранын ага мүмкүнчүлүк берип, колдоо көрсөтүүгө чакырды. Ошондой эле мурдагы президент Трамптын штабына жардам бергендерге ыраазычылыгын айткан.
Белгилей кетсек, шайлоонун алдын ала жыйынтыктарына караганда, Байден 290 тандоочунун добушун алды. Ал эми жеңишке жетүү үчүн 270 добуш жетиштүү.
