БИШКЕК, 19-мар. — Sputnik. Дүйнөлүк саламаттык сактоо уюмунун (ДССУ) башкы жетекчиси Тедрос Адханом Гебрейесус COVID-19 вирусуна каршы алгачкы вакциналарды тестирлөө башталганын айтты. Бул тууралуу РИА Новости кабарлады.
Билдирмеге ылайык, ДССУ жетекчиси коронавирустун жаңы түрү чыккандан кийин 60 күнгө жетпей эксперттер вирусту текшерип, сыноо жүргүзө баштаганы жетишкендик экенин айтты.
"Биз дүйнө жүзүндөгү илимпоздорго сыноодогу дары-дармектерге системалык түрдө баа берүүнү сунуштайт элек", — деди Гебрейесус.
Дүйнөлүк саламаттык сактоо уюму буга чейин коронавирус пандемиясын жарыялаган. Азыркы тапта дүйнө жүзү боюнча бул вирусту жуктуруп алгандардын саны 218 809 адамга жетти. Илдеттен 8810 адам көз жумуп, 84 113 киши айыкты.
Бул вирус Кыргызстанга да жетти. Өлкөдө үч адамдан коронавирус аныкталды. Алар Сауд Аравиядан кичи ажылыктан келишкен.
