Белоруссиялык журналист аял эфирге мас абалында чыкканбы? Видео

1-январь күнү кечинде алып баруучу Минскидеги жаңы жылдык майрамдоо учурунда түз эфирге чыккан.

Видеодо көрүнүп тургандай, эфир болуп жатканда ал сөздөрдү туура эмес айтып, мукактанып, айтор, кыйналып алып барган. Бир убакта таптакыр эле сүйлөбөй коюп, андан кийин сөзүн улаган.

Соцтармак колдонуучуларынын көбү аны мас деп ойлошкон.

"Эфир учурунда мас болуп, аягында жыгылып кала жаздагандай эле көрүндү", — деп жазган YaRu аттуу колдонуучу.

"Эми жаңы жыл эмеспи. Кечиримдүү", — деген Барух Цукерман аттуу колдонуучу.

Айрымдары түз эфир учурунда Козлова ооруп же жөн гана толкунданып кеткен деп божомолдошту.

"Анын абалы начарлап кетти...", — дейт nikitka1993.

"Адам толкунданып жатат. Балким анын биринчи түз эфири. Пульсу 120-130га жетти. Дем жетпей, жүрөгү дүкүлдөп жатат. Мындан улам көз алдында тамгалар ыргып жаткандыр. Эмне кылганын өзү билбейт, бирок аягына чейин карманды", — деп жазган Andy Andy аттуу колдонуучу.

Кийинчерээк түз эфир учурунда журналист аял өзүн жаман сезгени маалым болду. СТВ каналынын кызматкери Вероника Гришкова Facebook баракчасына Козлова өзүн начар сезгендиктен, эфирге ушундай абалда чыкканын жазган.

"Бул өзгөчө кырдаал. Мындай учур дайыма боло бербейт. Бирок андан эч ким өзүн-өзү камсыздандырган эмес. Түз эфирге Козлова биринчи жолу чыкты. Толкундангандыктан кан басымы көтөрүлүп кеткен", — деп жазган Гришкова.

Анын айтымында, эфирден кийин журналист аял эсин жоготуп, Тез жардам кызматын чакыртышкан. Азыркы учурда анын абалы дурус.