БИШКЕК, 17-июн. — Sputnik. Монголиянын президенти Халтмаагийн Баттулга кыргызстандык дзюдочуларды Токидо өтө турчу Олимпиада-2020 оюндарына чогуу даярданууга чакырды. Бул туурасында КРдин Улуттук дзюдо (УДФ) федерациясынан кабарлашты.
13-июнда Бишкекте Баттулга менен УДФ президенти Жолдошбек Көлбаев жолугушуп, Кыргызстан менен Монголиянын Дзюдо федерацияларынын ортосундагы кызматташтык тууралуу сүйлөшүшкөн.
"Монголиянын президенти өз өлкөсүнүн Дзюдо федерациясын жетектейт. Ал Кыргызстандын улуттук курама командасын расмий түрдө Токидо өтө турчу Олимпиада-2020 оюндарына чогуу даярданууга чакырды", — дешти федерациядан.
Эске сала кетсек, 12-13-июнда Баттулга расмий сапар менен Кыргызстанга келип, 14-июнда ШКУ саммитине катышкан.
Баттулга убагында дзюдо жана самбо боюнча өлкөсүнүн улуттук курама командасына алынып, самбодон дүйнө чемпиону жана эки ирет күмүш байгеге ээ болгону маалым.
