БИШКЕК, 12-июл. — Sputnik. Россияда өтүп жаткан Футбол боюнча дүйнө чемпионатынын финалында Франция менен Хорватия беттешмей болду.
Бишкек убактысы боюнча түнкү саат 12:00дө Москвадагы "Лужники" стадионунда Хорватия менен Англия жарым финалда беттешип, Хорватия 2:1 эсебинде жеңишке жетти.
Оюнга түркиялык калыс Жүнейт Чакыр көз салды.
Биринчи тайм башталбай жатып эле Англия курамасынын жарым коргоочусу Киран Триппье бешинчи мүнөттө гол киргизип, командасын алдыга сууруп чыкты.
Хорватиянын жарым коргоочусу Иван Перишич 68 мүнөттө эсепти теңеди. Ошентип экинчи таймдын жыйынтыгы менен командалар тең чыгып, калыс үч мүнөт кошуп берди.
Кошумча берилген убакытта хорватиялык Марио Манджукич 109-мүнөттө гол киргизип, командасын алдыга сууруп чыкты.
Буга чейинки жарым финалды Франция менен Бельгия ойноп, Франция 1:0 эсебинде жеңишке жетип финалга чыккан болчу.
