БИШКЕК, 7-апр. — Sputnik. Бишкек шаарында 8-9-апрелде шахмат боюнча республикалык ачык турнир өтөт. Бул тууралуу уюштуруучулар билдирди.
Маалыматка ылайык, мелдеш эл аралык "Сапат" билим берүү мекемеси жана Шахмат федерациясынын колдоосу менен өтмөкчү.
Мелдештин максаты сергек жашоону пропагандалоо, жаш балдар жана өспүрүмдөр арасында шахмат спортун жайылтуу болуп саналат.
"Шахмат турнирине өлкөнүн бардык аймактарынан келген 6-14 жаштагы 260 окуучу катышат. Ал Эл аралык шахмат федерациясынын эрежелеринин негизинде өтүп, оюн үчүн берилүүчү убакыт чектелет. Турнир эрежеси боюнча шахмат жети тур ойнолуп, ар бир катышуучуга 15 мүнөт, ал эми ар бир жүрүшкө кошумча 5 секунд кошулат", — деп айтылат маалыматта.
Жеңүүчүлөр топтолгон упайдын негизинде аныкталат.
