22:31 23 Теке 2021
Түз эфир
  • USD84.2620
  • EUR99.2101
  • RUB1.1423
Коом
Кыскача шилтеме алуу
500 0 0

Ысык-Көл облусунда жол кырсыгына кабылган ырчы Анжеликанын өзүнөн жана кичүү кызынан тышкары кечээ тун кызына дагы операция жасалганы кабарланды.

БИШКЕК, 6-фев. — Sputnik. Жол кырсыгына кабылган ырчы Анжелика Кайратова менен кыздары Айыма жана Айлиндин абалы тууралуу алар дарыланып жаткан Бишкек травматология жана ортопедия илим-изилдөө борборунун жетекчиси, белгилүү сөөк дарыгери Сабырбек Жумабеков Sputnik Кыргызстан маалымат агенттигине айтып берди.

Эске салсак, Анжелика Кайратова 23-январдын таңында Ысык-Көл облусунда жол кырсыгына кабылган. Автоунаасында өзү менен кошо үч кызы болгон. Дарыгерлер беш жаштагы кызынын эки бутунун тең кашка жиликтери сынып, ырчынын өзүнүн омурткалары жабыркаганын айткан. Экөөнө тең операция жасалган. Кийинчерээк улуу кызы Айыманын да моюн омурткалары сынганы аныкталган.

Жумабеков ырчынын улуу кызы Айымага кечээ операция жасалганын билдирди. Ал буга чейин жеке клиникада дарыланып, андан кийин Травматология жана ортопедия илим-изилдөө борборуна которулган.

"Мен кечээ иш сапарынан келерим менен ырчынын улуу кызына операция жасап бердим. Анын мойну сынып, жүлүнү кысылып, бир буту менен бир колу иштебей калыптыр. Үчөөнө жалпысынан беш операция жасалды. Операциялардын бардыгы дүйнөлүк стандартка туура келет. Ырчы башында чет мамлекеттен дарыланууну пландаган, бирок достору Кыргызстанда дагы жогорку деңгээлдеги операциялар жасаларын айтып, мага алып келишиптир. Сырттан дарыланса абдан көп каражат кетмек", — деди Жумабеков.

Операциянын баалары тууралуу сураганыбызда ырчы менен кыздарына башка бейтаптар сыяктуу эле бекер жасалганы, каражат керектелүүчү материалдарга жана импланттарга төлөнгөнүн кошумчалады.

Дарыгер Анжелика менен кыздарынын абалы жалпысынан жакшы экенин белгиледи.

"Үчөө тең реанимациядан чыгып, жалпы бөлүмдөгү бир палатада жатат. Абалдары туруктуу, жакшы десек болот. Анжеликанын омурткасынан тышкары балтыр сөөгү да сынган, азыр балдак менен баса баштады. Балдак менен дагы 1-2 айча басканга туура келет", — деди сөөк дарыгери. 

Жумабеков Анжелика кыздары менен ооруканадан 10 күндөн кийин чыгарылышы мүмкүн экендигин, андан кийин ден соолуктарын калыбына келтирүү убактысы башталарын кошумчалады.

Тема боюнча

Анжелика менен кызы реанимацияда. Кичүү кызына бүгүн операция жасалат
"Айламды таппай калдым". Ырчы Анжелика улуу кызынын да мойну сынганын билдирди
Белгилер:
абал, оорукана, операция, ырчы, Сабырбек Жумабеков, Анжелика Кайратова

ЭҢ МААНИЛҮҮ