БИШКЕК, 28-сен. – Sputnik. Ош шаарында коронавирустун экинчи толкунун алдын алуу максатында санитардык көзөмөлдү күчөтүү талабы коюлду. Бул тууралуу калаа мэриясынан билдиришти.
Маалыматка караганда, бүгүн Жарандык коргоо штабынын кезексиз жыйыны болуп өткөн. Ага биринчи вице-мэр Саибжан Турдуев, күч түзүмдөрү, Өзгөчө кырдаал министрлигинин Ош шаарындагы өкүлдөрү, билим берүү жана саламаттык сактоо тармагынын кызматкерлери, муниципалдык аймактык башкармалыктардын башчылары катышты.
Министрлик базарды хлордогондон кийин вирус күчөөдө дегендерге жооп кайтарды
Жыйында элге түшүндүрүү иштерин жүргүзүү менен илдетти алдын алуу максатында күчөтүлгөн тартипте иш алып баруу табышталды.
"Эми шаарда күчөтүлгөн тартипте көзөмөл жүрөт. Бардык жарандарды коомдук жайларда бет кап тагынып, антисептик колдонууга чакырабыз. Зарылчылык болбосо массалык иш-чараларга барбай турсаңыздар бизге чоң жардам. Атайын штабдын өкүлдөрү бардык аймактардагы мекеме-ишканаларды, коомдук жайларды текшерет. Ош шаарындагы бардык базарлар ар дүйшөмбү сайын дезинфекция үчүн жабылат. Жарандардан карантиндик эрежени сактоону суранабыз", — деди Турдуев.
Штабдын мүчөлөрү карантиндик эрежелерди сактабагандар мыйзам чегинде жоопко тартыларын кошумчалашты.
Ооруканалардын абалы
Ош шаардык клиникалык ооруканасынын балдардын жугуштуу оорулар стационарынын эски имараты капиталдык оңдоп түзөөдөн өтүп, 180 орун даярдалган. Ага кошумча дагы 100 орундуу жаңы имарат октябрдын башында колдонууга берилет. Ош шаардык ооруканасынын эски имаратында 100 орун даярдалып, учурда иштеп жатат. Ош шаарында жалпысынан 380 орун вирус күчөгөн учурда иштөөгө даяр, мындан тышкары, резервде да имараттар бар. Керектелүүчү коргоочу кийимдер, кычкылтек концентратору, ИВЛ аппараттары жетиштүү деңгээлде. Дары-дармек эки айлык запас менен алынганы айтылды.
