БИШКЕК, 18-июн. — Sputnik. Жогорку Кеңештин маалымат кызматынын жетекчиси Ибрагим Нуракун уулунан коронавирус табылды. Бул тууралуу өзү Facebook баракчасына жазды.
Айтымында, вирус андан бүгүн, 18-июнда, аныкталган.
"Урматтуу кесиптештер, ушул дем алыш күнү дене табым көтөрүлгөндүгүнө байланыштуу үйдө олтуруп иштеп жаткам. Эртең менен жумушка чыгар алдында алдын ала текшерүүдөн өткөм. Жана эле дарыгерлер анализимен COVID-19 табылганын айтышты. Буга байланыштуу дагы 14 күн үйдөн чыкпай иштемей болдум. Мени менен жакын контактыда болгон Жогорку Кеңештин маалымат кызматындагы башка кесиптештерим да дистанттык иш тартибине өтүүдө. Буга байланыштуу эртеңки иш-чараларыбыз түз эфирде чагылдырылбайт. Кесиптештеримдин бардыгы анализи таза чыкса, келерки аптадагы жыйындарды толук чагылдырабыз деген үмүттөбүз", — деп жазган ал.
Ал айрым депутаттар да коронавируска тест тапшырганын кошумчалаган.
"Биз менен чогуу аппараттын жана иш башкармалыктын бир катар кызматкерлери, айрым депутаттар да бүгүн кечке маал тест тапшырышты. Жыйынтыктары бир-эки күндө белгилүү болот. Сиздердин ишиңиздердеги ыңгайсыздыктар үчүн кечирим сурайбыз! Карантин учурунда бир дагы кесиптешим менен кол алышып учурашкан эмесмин, жумуш маалында ар дайым антисептик, бет кап колдонуп келгем. Тилекке каршы, аяган көзгө чөп түшөт дегендей, бул мен жана үй-бүлөм үчүн абдан өкүнүчтүү окуя болду. Оорубаңыздар", — деп жазган Нуракун уулу.
Буга чейин Жогорку Кеңештен эч кимден коронавирус чыккан эмес.
