БИШКЕК, 4-май — Sputnik. Ошто 1-майдан тарта ишин жанданткан 53 ишкана санитардык-карантиндик талаптарды толук аткарбаганы үчүн кайрадан жабылды. Бул тууралуу Ош шаарынын комендатурасынын маалымат борборунан билдиришти.
Ош шаары жана Ноокат, Кара-Суу райондорунда иштеп баштаган ишканаларга санитардык-карантиндик эрежелердин сакталышы боюнча рейд жүргүзүлгөн.
Анын жыйынтыгында жалпы 141 мекеме-ишкана текшерилип, санитардык талаптарга жооп берген 75 мекемеге иштөөгө уруксат берилди.
Мындан сырткары 10 ишканага оозеки эскертүү берилип, 3 касапкана жабылган.
Рейдге санитардык-эпидемиологиялык көзөмөлдөө борборунун, аймактык ветеринардык жана фитосанитардык коопсуздук боюнча инспекциянын, Өзгөчө кырдаалдар башкармалыгынын, райондук милиция жана комендатуранын кызматкерлери чыккан. Анда мекеме-ишканалар, соода түйүндөрү, чачтарачкана, сулуулук салондору, унаа оңдоочу жайлар, эт сатуучу дүкөндөр, курулуш объектилери жана такси кызматтары текшерилген.
