БИШКЕК, 27-апр. – Sputnik. Борбор калаанын коменданты Алмаз Орозалиев соцтармактагыларды география жаатындагы билими менен таң калтырган туруктуу үй-жайы жок кишиге жардам бергиси келет. Бул тууралуу коменданттын Facebook баракчасына жарыяланды.
"Үй-жайы жок адамдын энциклопедиялык билими мени таң калтырбай койгон жок. Видеосун көрүп, акылына баа бердим. Урматтуу достор, бул кишинин жүргөн жерин билгендер болсо комментарийге жазып койсоңуздар. Ага азык-түлүк берип, колдоо көрсөтөт элек", - деп жазды Орозалиев.
Ал ошондой эле мектепте окуп жүргөн кезинде география сабагын жакшы көргөнүн кошумчалаган.
Эске салсак, буга чейин Кыргызстандын интернет айдыңына үй-жайы жок адамдын видеосу тараган. Анда ал география жаатындагы билими менен бөлүшкөн.
