БИШКЕК, 12-дек. — Sputnik. "Ош" базарынын аймагындагы "Берекет универсал" кичи базарынын 500дөн ашуун соодагери митингге чыкты.
Сатуучулар базар жетекчилиги апрель айында өчүрүп кеткен электр энергиясын кайра кошуп берүү талабын коюуда. Ошондой эле алар мындан эки ай мурун Бишкек шаарынын мэри Азиз Суракматовдун "10 күндүн ичинде электр кубаты берилет" деген убадасы аткарылбаганына нааразы болушууда. Мындан улам митингчилер калаа башчысынын келишин талап кылышты.
Бирок анын ордуна вице-мэр Азиз Алымкулов, аппарат жетекчиси Балбак Түлөбаев жана Ленин районунун акими Токтосун Султанов барды.
Эскерте кетсек, "Берекет универсал" кичи базарын жаап, ал жерге соода комплексин куруу пландалууда. Буга каршы болгон соодагерлер жыл башынан бери эле митингге чыгып, мамлекеттик органдарга кайрылып келишет. Алар эгер базар жабылса, кайда барабыз деп нааразы.
Митингчилер "Берекет универсал" кичи базары жайгашкан жер мэрияга карагандыктан жеке адамга таандык "Берекет" компаниясынын карамагынан чыгарылсын деген талапты коюуда. Эгер муниципалдык базарга айланса, мэрияга бир айда ижара акысынан эки миллион сом түшөрүн айтышат.
