БИШКЕК, 14-окт. — Sputnik. Азиз Батукаевдин иши боюнча соттук отурумга мурунку президент Алмазбек Атамбаев келген жок. Андыктан Биринчи Май райондук соту 15-октябрга чейин кайрадан тыныгуу жарыялады. Бул тууралуу райондук соттун өкүлү Асел Равшанбекова журналисттерге билдирди.
Ал ошондой эле сот ЖАМКга Атамбаевди эртеңки сотко алып келүүнү камсыздоо тапшырмасы берилгенин кошумчалады.
Равшанбекова, андан сырткары, журналисттердин "Атамбаев күч менен алып келиниши мүмкүнбү?" деген суроосуна "андай норма жок" деп жооп берди.
Сот өкүлүнүн айтымында, Атамбаев эртең дагы келбесе, кийинки кадам кандай болорун сот чечет.
Бүгүн Биринчи Май райондук сотунда абактан мыйзамсыз бошотулган кримтөбөл Азиз Батукаевдин иши боюнча баштапкы сот жыйыны болуп, бирок айыпталуучу Атамбаев келбегендиктен 15-октябрга чейин тыныгуу жарыяланды.
Бүгүнкү сот отурумуна мурдагы прокурор Индира Жолдубаева келди.
Эске салсак, Батукаевдин иши Бишкектин Биринчи Май райондук сотуна өткөрүлгөн. 11-октябрда кылмыш иш боюнча биринчи соттук отурум башталып, ага мурдагы прокурорлор Аида Салянова, Индира Жолдубаева келген. Ал эми Алмазбек Атамбаев сотко катышуудан баш тарткан болчу.
Азиз Батукаев 2006-жылы баңгизатты мыйзамсыз сактоо, жарылуучу заттарды жана курал-жаракты мыйзамсыз алып жүрүү, массалык башаламандыкты уюштуруу боюнча айыпталып, 16 жылга эркинен ажыратылган. 2008-жылы абак тартибин бузганы үчүн жаза мөөнөтүнө дагы эки жыл кошулуп, Нарындын №24 абагына которулган. Бирок 2013-жылдын 9-апрелинде оор дартка кабылганына байланыштуу делип бошотулуп, Кыргызстандын аймагынан Грозныйга учуп кеткен. 2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга эркинен ажыратылып, Чечен Республикасында жаза мөөнөтүн өтөп жатат.
Анын бошотулушу боюнча бир катар мурдагы аткаминерлер менен дарыгерлер да суракка чакырылып, кээси камакка алынган. Ал эми мурунку башкы прокурор Аида Салянова, ошол кездеги вице-премьер Шамил Атаханов жана саламаттык сактоо министри Динара Сагинбаева, мурунку башкы прокурор Индира Жолдубаева тергөө менен кызматташмай болду деген жүйө менен үй камагына чыгарылган.
Биздин Telegram-каналга жазылыңыз.
