БИШКЕК, 23-апр. — Sputnik. Керебетте 4-5тен, калганы полдо уктап жаткан балдардын видеосу тартылган Бишкектеги №1 "Шоола" балдар бакчасынын директору Айнагүл Мадылбаева окуя боюнча Sputnik Кыргызстан агенттигине комментарий берди.
Белгилей кетсек, социалдык тармакта 50дөн ашык баланын бир бөлмөдө жаткан видеосу тараган. Андан бир керебетте төрт-бештен бала узун-туурасынан, калганы полдо уктап жатканын көрүүгө болот. Балдардын үстүн да жууркан менен жабышкан эмес. Бул соцтармак колдонуучуларынын нааразычылыгын жаратып, кызуу талкууланууда.
Директордун айтымында, видео 19-апрелде тартылган. Ал күнү башка бөлмөнүн полун сырдап койгондуктан эки тайпанын балдарын бириктирип уктатышкан.
"Эки жума мурун бакчаны актап, сырдаганбыз. Курулушчулар кичи тайпадагы балдардын бөлмөсүнүн дубалын актагандан кийин полдогу чачырандысын тазалабай кетишиптир. Ата-энелер муну көрүп нааразы болгондуктан жума күнү, 19-апрелде, полду кайра жууп-тазалап, сырдадык. Ал күнү балдардын тамагын бергенден кийин ортончу тайпа менен кошуп уктатууну чечкенбиз. Ал күнү кечинде сырдасак, дүйшөмбүгө чейин кургабай калмак. Бир күн эле ушинтип жатышкан, аны кимдир бирөө видеого тартып алыптыр", — деди Мадылбаева.
Ошондой эле директор бала бакчада 321 бала тарбияланарын, ар бирине бирден керебет, жууркан, жаздыктары жетиштүү экенин белгиледи.
Ал убакта директор өзү алты тайпанын бирден тарбиячысын алып, бакчанын тегерегин тазалоо үчүн ишембиликке чыкканын айтты.
Бул боюнча Биринчи Май райондук билим берүү борборунан 10 киши келип текшерип кеткенин да кошумчалады.
Ал эми Бишкек шаардык билим берүү башкармалыгынын жетекчиси Сауле Мейрманова 2018-жылга карата берген маалыматында, калаада муниципалдык 85 бала бакча бар экенин айткан. 14 миң орунга ылайыкташкан бакчаларда 25 миң бала тарбияланат.
Жеке менчик бала бакчалардын саны 215ке жетет. Анда тарбияланган балдардын саны 15 миң. Жеке менчик менен мамлекеттик бала бакчалардагы бөбөктөрдү кошуп эсептегенде жалпы 40 миң бала чыгат.
Мейрманованын маалыматына караганда, Бишкекте 6 жашка чейинки 88 миң бала бар. Калган 48 миң бала бакчага барбайт дегенди түшүндүрөт.
Деген менен Мамлекеттик мүлк фондусу 1991-2018-жылдары 19 бала бакча жеке менчикке өтүп кеткенин Sputnik Кыргызстан агенттигине билдирген. Анын үчөө гана кайрадан мамлекетке кайтарылган.
