БИШКЕК, 30-сен. — Sputnik. Бишкек шаарында Башкы прокуратуранын мурдагы имаратынын ордуна шаардыктардын эс алуусу үчүн аянтча 2019-жылдын аягына чейин курулуп бүтөт. Бул тууралуу Sputnik Кыргызстан агенттигине мэриянын аппарат башчысы Балбак Түлөбаев билдирди.
Анын айтымында, жакында бишкектик архитекторлор арасында эс алуу аянтынын долбоору боюнча сынак жарыяланат.
"Бул жерде капиталдык курулуш болбойт. Шаардыктардын эс алуусу үчүн жашыл аянт куруу каралып жатат. Негизи эле жакынкы 7-8 айдын ичинде Бишкекте жашылдандырылган, спорт менен алектенүүгө ыңлайлуу аянттар көбөйтүлөт", — деди Түлөбаев.
Белгилей кетсек, 2010-жылы 7-апрелдеги окуяларда толугу менен күйүп кеткен имаратты оңдоо үчүн тендер жарыялаган. Калыбына келтирүү иштерине Бишкек шаарынын бюджетинен 120 миллион сом бөлүү каралган.
