БИШКЕК, 24-сен. — Sputnik. Сеулдагы учакта чуу салган министрдин мурдагы орун басары Зууракан Каденова окуя боюнча Sputnik Кыргызстан агенттигинин кабарчысына түшүндүрмө берди.
Айтымына караганда, анын 3-4 күндөн бери жүрөгү ооруп учакка отуруу алдында корвалил дарысын жана валерьянканы кола менен ичкен.
"Мени дары куюлган кичинекей бөтөлкө менен бортко чыгарбайт деп адаттагыдан көбүрөөк ичип алгам. Мурда 30 тамчы ичсем, анда 40дан ашык тамчы ичкен элем. Ага чейин да женьшень дарысына кошуп кофе ичип алгам. Учакка киргенде өзүмдү жаман сезе баштадым. Коопсуздук курун тагынганда көңүлүм айнып ажатканага барууну сурандым. Бирок мени чыгарууга макул болушпай желим баштык алып келип беришти", — деди Каденова.
Каденова өзүн жакшы сезип калганын жана учуп кете аларын айткан. Бирок учак кызматкерлери анын билетин алмаштырып кийинки каттам менен жөнөтүүнү чечишкенин билдирди.
Ошондой эле ал Air Astana компаниясы аны кара тизмеге киргизбегенин айтты.
Эскерте кетсек, депутат Аида Исмаилова Сеулда жогорку кызматта иштеген кыргызстандык мас аял бир сааттан ашык жаңжал салып, анын айынан Алматыга уча турган учак эки саат кармалып калганын айткан. Кийинчерээк ал эмгек, социалдык өнүгүү министринин орун басары Зуура Каденова экени белгилүү болгон.
Бул окуядан кийин өкмөт башчы Мухаммедкалый Абылгазиев аны кызматынан алуу боюнча буйрукка кол койгон.
