БИШКЕК, 12-июл. — Sputnik. Ушу тапта медицина кызматкерлеринин айлык акысын жогорулатуу маселеси каралып жатат. Бул тууралуу президент Сооронбай Жээнбеков Таласка болгон иш сапарынын учурунда Кара-Буурадагы оорукананын ачылышында айтты.
Мамлекет башчынын маалымат кызматынын билдиргени боюнча эки кабаттуу оорукана Аманбаев айыл аймагында жайгашкан. Келгендерди жаңы мекеменин ачылышы менен куттуктап, аймактарда жашаган элдин турмушу үчүн бардык шарттар түзүлүшү керектигин белгиледи.
"Жыл сайын саламаттык сактоо объектилерин куруу, калыбына келтирүү жана оңдоп-түзөө үчүн миллиарддаган каражат бөлүнөт. 2011-жылдан бери медиктердин маянасы көтөрүлө элек. Ушу тапта бул маселени карап жатабыз", — деди президент.
Белгилей кетсек, Аманбаев айылындагы оорукананын курулушу 2014-жылы башталып, 65,6 миллион сом сарпталган. Мекемеде 50 киши иштемекчи, анын 15и — дарыгер болсо, 20сы — орто, 18и — кенже медицинадык персонал. Жыл сайын аталган ооруканага мамлекет 60 миллион сом бөлүп турмакчы. Медицинадык жай райондун 14 айылынын элине кызмат кылат.
