НАРЫН, 29-дек. — Sputnik. Бүгүн Тайлак баатыр атындагы Нарын облустук №2025 чек ара башкармалыгынын кызматкерлери жана Мамлекеттик жаза аткаруу кызматынын өкүлдөрүнө батирлердин ачкычы тапшырылды. Бул тууралуу аймактык кабарчы билдирди.
Кызматтык батирлердин ачкычын өкмөт башчы Сапар Исаков Нарын облусуна болгон иш сапары учурунда салтанаттуу тапшырып берген. Батирлерге ысык, муздак суулар киргизилип, жылуулук дагы берилген. Бул үйлөргө батирге муктаж болгон кызматкерлер киришти. Учурда Нарын шаарында өзгөчө кырдаалдар кызматкерлери үчүн дагы үй курулууда.
Эки турак жай тең 24 батирлүү. Жаза мөөнөтүн өтөөчү жайларда иштеген кызматкерлерге арналган үйлөр бир бөлмөлүү болсо, чек ара кызматынын турак жайында 1, 2, 3 бөлмөлүү батирлер бар. Бул курулуш аскер жана укук коргоо кызматкерлерин турак жай менен камсыздоо боюнча каралган Россия Федерациясынын материалдык жардамынын эсебинен каржыланды.
