08:50 24 Тогуздун айы 2019
Түз эфир
  • USD69.8230
  • EUR77.6292
  • RUB1.0944
Кош бойлуу аял. Архив

Эрте жана кеч төрөсө эмне болот? Гинекологдун кеңеши

© Sputnik / Табылды Кадырбеков
Коом
Кыскача шилтеме алуу
1004140

Бала — бакыт. Мындай бакыт ар бир аялга ар кандай учурда буюруп, айрымдары 18 жашка чыга электе эле төрөп койсо, кээ бири кырктын кырына келгенде гана наристе жытын жыттайт. Бирок дарыгерлер өтө кеч же өтө эрте төрөт эне-баланын ден соолугуна кедергисин тийгизип калышы мүмкүн дейт.

Негизи эле аялзаты үчүн кайсы учур төрөткө, кош бойлуулукка ылайыктуу. Дени сак бала төрөйм деген эне эмнелерди эске алышы керектигин Sputnik Кыргызстан агенттигине Эне жана баланы коргоо борборунун акушер-гинекологу Анара Ордокова айтып берди.

Өспүрүм куракта төрөгөн эмнеге алып келет?

12ден 18 жашка чейинки мезгил өспүрүм курак деп эсептелет. Бул учурда кыздар өздөрү бала болгондуктан төрөмөк тургай турмушка чыгууну ойлогону эрте. Бул учурда өспүрүм кыздардын физиологиясы, организми жыныстык катнашка, бала төрөөгө али даяр эмес экендигин эске салабыз.

Мындан улам:

— бойдон түшүп калуу коркунучу болот;

— бала ара төрөлүп калышы ыктымал;

— кокустан боюна бүтүп калган кыздар аны ата-энесинен жашырууга аракет кылып таңып, туура эмес тамактанышат. Көп нерсени ойлонот. Мындай учурда түйүлдүк жакшы өспөй, бала ичинен өлүп калышы мүмкүн;

— жаш кыздын бөйрөк, жүрөк же башка ооруларга чалдыгышы ыктымал;

— төрөттө кансырап, алы кетет. Эмчегинин үрпү кичине болгондуктан ымыркайын тойгуза албай кыйналып да калган учурлар кездешет;

— эне болууга моралдык жактан даяр болбойт, көбүнчө аны ата-энеси багып берет.

Төрөт үчүн ыңгайлуу курак

Аялдардын турмушка чыгып, балалуу болууга эң ыңгайлуу курагы 20 жаштан 40ка чейинки учур. Аял кишинин дене түзүлүшү төрөткө 20 жаштан соң даяр болуп, толук жетилет. Андыктан, турмушка чыгууну ушул курактан кийин ойлонсо деле кыздар баарына жетишет.

Жашы өткөндө төрөгөн канчалык зыян?

Бардык эле аял 20 жаштан 40 жашка чейин төрөп үлгүрө албайт. Жашы өткөндө турмушка чыккандардын ичинен боюна бүтпөй жүрүп, кеч бала көргөндөр бар. Бирок 40тан өткөндөн кийин аялдын организми алсыз болуп, ар түрдүү ооруга чалдыгышы ыктымал. Жашы өткөндө кош бойлуулуктун коркунучтуусу — ымыркай Даун синдрому менен жарыкка келиши мүмкүн. Кант диабети бар аялдардын бул учурда төрөгөнгө мүмкүнчүлүгү аз. 40тан өтүп төрөгөндөр деле көп, бирок алар дарыгердин тыкыр кароосунда болуп, бардык оорусун көзөмөлдөтүп турушу зарыл.

Дени сак бала төрөйм десеңиз:

— гинекологго сөзсүз каттоого туруңуз;

— медициналык көзөмөлдөн ай сайын өтүңүз;

— гинеколог жазып берген витаминдерди калтырбай ичиңиз;

— стресс, депрессиядан оолак болуп, дени сак жашоо менен дос болуңуз!

Ар бир нерсенин өз убагында болгону жакшы, андыктан жашы жете элек секелектер эч нерсеге шашылбай, жаш курагы өтүп бара жаткан айымдар эртерээк балалуу болуп алууга аракет кылышы керек.

Тема боюнча

Аялзатын бүк түшүргөн гинекологиялык 10 илдет
Төрөткө байланыштуу 7 аңыз. Кыргызстандык кыз-келиндердин жаңылыштыгы
Белгилер:
аял, төрөт, жаш курак, ымыркай, Кыргызстан

ЭҢ МААНИЛҮҮ