БИШКЕК, 24-окт. — Sputnik. Памирден келген кыргыздар бүгүн Нарын районунун Куланак айылына жайгаштырылды. Бул туурасында Sputnik Кыргызстан агенттигине аймактык кабарчы билдирди.
Этникалык кыргыздар №86 кесиптик лицейде жашап, билим алышат. Аларды өкмөттүн Нарын облусундагы өкүлүнүн орун басары Жаркын Ибраева, райондун акими Түгөлбай Жанбоев жана жергиликтүү тургундар тосуп алышты.
Белгилей кетсек, 13-октябрда Улуу жана Кичи Памирден 33 адам Нарынга алып келинген. Алардын 16сы өспүрүм, экөө жеткинчек калгандары ата-энелер. Келгенден кийин Нарын облустук бириктирилген ооруканасында медициналык кароодон өтүшкөн. Алардын бири Жанбүбү Маматзайым кызы 21-октябрда Бишкектеги Эне жана баланы коргоо борборунун алдындагы төрөт үйүндө көз жарып уулду болгон.
