БИШКЕК, 6-сен. — Sputnik. Жаңы окуу жылынан баштап 10 күн катары менен сабактан калган 5-16 жаштагы балдардын аты-жөнү атайын базага киргизиле турганын ЮНИСЕФтин маалымат кызматы билдирди.
19-июнь күнү балдардын каралбай калган учурун азайтуу үчүн мектептерде жаңыланган система киргизүү боюнча өкмөттүн токтому чыккан. Мында мектептер ай сайын жергиликтүү администрацияга жана социалдык кызматкерлерге балдардын сабакка келүүсү боюнча маалыматтарды берип турат да, бул статистика түзүүгө шарт түзөт.
"Балдардын эсебин алуу, социалдык кызматтар менен тыгыз иштешүү окуучулардын мектептен калбоосун жана билим алуусунун деңгээлин жакшыртууну шарттайт", — деп айтылат маалыматта.
Эми 10 күн катары менен окуудан калган балдар окуу жайдын жетекчилиги тарабынан көзөмөлдө болот. Андан ашык күн калса жергиликтүү бийлик өкүлдөрүнөн түзүлгөн комиссия жана өспүрүмдөр менен иш алып барган инспекторлор тартылат.
