БИШКЕК, 30-июн. — Sputnik. Президент Алмазбек Атамбаев Өзгөчө кырдаалдар министрлигинин кызматкерлери үчүн салынган үч көп батирлүү турак жайдын ачылыш салтанатына катышып, жаңы үй ээлерине ачкыч тапшырганын өлкө башчынын маалымат кызматы билдирди.
Мамлекет башчы жаңы конуштуу болгон мемекенин кызматкерлерине куттук айтып, 20-30 жылдан бери үйгө жетпей жүргөндөрдү акыркы үч жылдан бери там-таш менен камсыздоо салтка айланып калганын белгиледи.
Муну менен бирге алдыда боло турган президенттик шайлоо тууралуу айтып, өлкө жетекчилигине ушу тапта башталган иштерди өксүтпөй алып кете ала турган киши келерине ишеним артты.
Президент ак кызматы үчүн мекеменин 7 кызматкерине кол саат тапшырып, министр Кубатбек Бороновго үйлөрдүн алдында балдар аянтчаларын куруу үчүн 300 миң сомдук сертификат тапшырды.
