БИШКЕК, 23-мар. — Sputnik. Бишкекте жыл башынан бери капиталдык курулуштун 14 объектиси түрттүрүлдү. Бул тууралуу Sputnik Кыргызстан мультимедиалык борборунда мэриянын жер иштетүү жана курулуш башкармалыгынын жетекчиси Талант Иманакун уулу маалымдады.
Анын айтымында, 2017-жылдын 6-январында мэрия Бишкек шаарынын аймагындагы мыйзамсыз курулган объекттерди текшерүү жана бөгөт коюу максатында оперативдүү штаб түзгөн. Аталган штаб түзүлгөндөн бери калаада мыйзамсыз тургузулган 910 объект алынып салынган.
Ошондой эле капиталдык курулуштун 14 объектиси түрттүрүлгөн.
"Абдымомунов көчөсүндө муниципалдык аймакты жеке менчикке өткөрүп алган факты катталса, "Жал" кичирайонунда павильондор алынды. Мындан сырткары, Некрасов көчөсүндөгү баннерлер алынып, Панфиловдогу "Домино", Шабдан баатырдагы "Луиза" кафелери түрттүрүлгөн", — деди Талант Иманакун уулу.
Рейд учурунда Кулатов көчөсүндөгү базардын тегерегиндеги жарнамалык конструкциялар менен Жамгырчинов көчөсүндөгү мыйзамсыз курулган дарбазалар алынган.
