БИШКЕК, 14-мар. — Sputnik. Ысык-Көл облусунун трассасындагы Раппопорт аллеясын туристтер менен жергиликтүү элдин эс алуучу жайына айлантуу пландалып жатат. Бул тууралуу өкмөттүн аталган аймактагы өкүлчүлүгүнүн маалымат кызматы билдирди.
Бүгүн өкмөттүн Ысык-Көлдөгү өкүлү Асхат Акибаев жыйын өткөрүп, ага архитекторлор менен бирге токой чарба башчылары катышкан.
Бүгүн жыйын учурунда архитекторлор келечектеги аллеянын эки варианттагы эскиздерин сунуштап, облустагы өкүл Асхат Акибаев менен макулдашышты.
Адистер комплекстин аймагында тротуарлар менен велосипед жүрүүчү жолдор салынарын, жолдун боюна дарактардын бир нече түрлөрү отургузуларын айтышты. Аллеянын узундугу 1400 метрге жетет.
"Бул аллея жалпы элдин эле эмес, чет жактан келген туристтердин да эс алуучу жайына айланып, ири иш-чараларды өткөрүүгө ылайыкташтырылышы керек", — деди Акибаев.
Ал 24-мартка чейин долбоордун акыркы вариантын иштеп чыгууну тапшырды. Токой чарбасынын жетекчилери көчөттөрдүн бир бөлүгүн бекер берүүгө макул болушту.
Эскерте кетсек, былтыр июнь айында аталган аллеяда бактар кыйыла баштаган. Тамчы — Корумду унаа жолунун реконструкцияланышынан улам кулайын деп калган теректер менен кара жыгачтар кыйылган.
