БИШКЕК, 6-мар. — Sputnik. Сатыкка "Манас" эпосунан сүрөттөр түшүрүлүп, каада-салттар чечмеленген дептерлер чыкканын Sputnik Кыргызстан агенттигине "Саякбай манасчы" эл аралык фондусунун жаштар канатынын төрагасы Нурбек Талантбеков билдирди.
Анын айтымында, дептерлер 16, 32 жана 48 барактуу болуп, ичиндеги сүрөттөр, түшүндүрмөлөр бири-бирине окшобойт.
"Дептердин сырткы жана биринчи бетинде "Манас" эпосунда колонулган сейрек сөздөрдүн түшүндүрмөсү, кыргыз эли колдонуп келген ырым-жырымдардын чечмелиниши, манасчылардын өмүр жолу сунушталат. Дептерлерге Теодор Герцен тарткан сүрөттөр пайдаланылды", — деди Таланбеков.
Ал демилге белгилүү манасчы Улан Исмаиловго таандык экенин кошумчалап, дептерлер "Саякбай манасчы" фондусу тарабынан чыгарылганын белгиледи.
