БИШКЕК, 29-июл. — Sputnik. Жогорко сотто 7-апрель боюнча отурум уланып, анда соттук коллегия акыркы чечимин чыгарды.
Аталган чечимге ылайык, Курманбек Бакиевдин жазасы өзгөртүлүп, 30 жылга эркинен ажыратылды. Буга чейин аскер соту мурунку президентти өмүр бою эркинен ажыраткан. Ал эми Жаныш Бакиев менен Данияр Үсөновду өмүр бою абакка отургузуу боюнча чечими күчүндө калды.
Жогорку соттун маалымат катчысы Айнура Токтошева Кылмыш жаза кодексине ылайык, 60 жаштан ашкандарга карата өмүр бою эркинен ажыратуу жазасы колдонулбай тургандыктан, Курманбек Бакиевдин жазасы өзгөртүлгөнүн кошумчалады.
2010-жылы Курманбек Бакиев 61 жашта болгон
Мындан сырткары Элмурза Сатыбалдиев, Каныбек Жороев жана Нурлан Турсункуловдорго карата кабыл алынган Аскер сотунун мунапысы жокко чыгарылды.
Ал эми Аскер сотунун калган өкүмү күчүндө калтырылды.
