БИШКЕК, 20-июн. — Sputnik. Экс-президент Алмазбек Атамбаев аны азыркы макамынан ажыратуу боюнча жыйындарга эмнеге чакырылган жок деген суроого депутаттык комиссиянын төрагасы Каныбек Иманалиев жооп берди.
Эл өкүлү Асел Кодуранова Атамбаев эмне себептен ушул убакка чейин комиссиянын ишине чакырылбаганына кызыкты.
"Иммунитетин алуу чечими каралган күнү Атамбаевди расмий түрдө чакырабыз. Бирок буга чейинки жыйындарыбыздын бардыгы ачык өттү. Жогорку Кеңештин маалымат кызматы каалоочуларга эшик ачык деп айткан. Ал эми расмий чакыруу жибербегенибиздин себеби бар. Юристтер менен кеңешсек, катты почта аркылуу жөнөтүшүбүз керек экен. Ал кат өтө кеч жетмек", — деди Иманалиев.
Эске салсак, аталган комиссиянын иши 18-июнда жыйынтыкталып, маселе Жогорку Кеңештин кароосуна жиберилген.
