БИШКЕК, 4-окт. — Sputnik. Жогорку Кеңештин депутаты Тынчтык Шайназаров Оштун жергиликтүү аткаминерлери Бишкектен келген министрлерди, министрдин орун басарларын ижарага алынган жол тандабастар менен тосуп алып жатканын парламенттин жалпы жыйынында ар түрдүү маселелер каралып жаткан учурда билдирди.
Эл өкүлү президент Сооронбай Жээнбековдун айрым аткаминерлердин жүрүм-туруму боюнча айтканына токтолду.
"Азыр эле президентибиз айрым аткаминерлердин жүрүм-туруму боюнча айтып кетти. Мен бир нерсени коңгуроо катары айтайын деп жатам. Азыр Ошко учкан чоңдордун талабы менен жергиликтүү чиновниктер аларды "Жиптер" менен тосуп алат. Жөнөкөй "Волга", "Жигулиде" болбойт экен. Жергиликтүү аткаминерлер ЗАГСтын алдына барып "Жиптерди" арендага алып, министр, министрдин орун басарларын, башкармалыктардын жетекчилерин тосуп алып, кымбат ресторандарга алып барат. Бардыгынын мүмкүнчүлүгү жок, ошол жерге карызга тамактанып, чоңдор кеткенден кийин айлыгынан кутулуп жүрөт. Ушуга бир бөгөт коюу керек", — деди депутат.
Ал ошондой эле өкмөттүн Жогорку Кеңештеги туруктуу өкүлү Ашырбек Темирбаевге кайрылып, мындай аткаминерлерге карата тарбия багытында иш жүргүзүү талабын койду.
