БИШКЕК, 18-сен. — Sputnik. Биринчи вице-премьер Кубатбек Боронов өкмөттүн түзүмүндөгү өзгөрүүлөрдү эки айдын ичинде парламентке алып келерин Конституциялык мыйзамдар, мамлекеттик түзүлүш, сот-укук маселелери жана парламенттин регламенти комитеттин жыйынында билдирди.
Тармактык комитеттин жыйынында "Ата Мекен" фракциясынын лидери Алмамбет Шыкмаматов премьер Мухаммедкалый Абылгазиев жаңы кызматка келгенде өкмөттүн түзүмүн өзгөртүү керектигин айтканын белгиледи.
"Премьер-министр келери менен өкмөттүн курамын өзгөртүү керектигин айткан. Коргоо министрлигин Башкы штаб кылып коюп чоң ката кетириптирбиз деген. Азыр сырт жакка чыкканда биздин генералдарды эч ким теңине албай жатат. Башкы штаб деген кичинекей гана офис. Өрт чыкканда, согуш болгондо күч органдары бирдиктүү башкарууну колго алуу үчүн бириге калчу эле жер", — деди ал.
"Энергетика министрлигине тийбегиле" дегенде парламенттен депутаттардын өпкөсүн үзүп койбодуңар беле. Кыргызстандын көзгө басар тармактарынын бири энергетика да, эң маанилүү тармакты холдинг кылып коюшкан. Эми ошону өзгөртпөйсүңөрбү! Мамлекеттик каттоо кызматына эле авто транспорт, кыймылсыз мүлк, архив, нике күбөлүгүн каттоо, жакында эми почтаны дагы бердиңер. Анда эмнеге аны кызмат кылып кармап отурасыңар, комитет же министрлик кылгыла да. Көзгө көрүнөр иштерди тездетсеңер", — деди депутат.
Өз кезегинде биринчи вице-премьер министр Кубатбек Боронов өкмөттүн жаңы түзүмүн 15-сентябрда алып келип тааныштырылат деп айтылганын, бирок ага жетишпей калышканын маалымдап, 1,5 – 2 айга жетпеген убакыттын ичинде өкмөттүн курамын алып келебиз деп сөз берди.
