Өкмөт башчы Сапар Исаковдун укуругу узарды

БИШКЕК, 1-дек. — Sputnik. "Конституцияга өзгөртүү киргизүү жөнүндө" мыйзамына ылайык, Баш мыйзамга киргизилген акыркы өзгөртүүлөр 1-декабрдан тарта күчүнө кирди.

Эскерте кетсек, 2016-жылдын 11-декабрында болгон референдумда кыргызстандыктар Конституциянын 29-беренесине өзгөртүү жана толуктоолорду киргизүүгө "макул" болушкан. Натыйжада 40ка жакын толуктоо киргизилген. Анын ичинен 70чи, 72чи, 75чи, 81чи жана 87- беренелерге киргизилген өзгөртүүлөр 2017-жылдын 1-декабрынан тарта күчүнө кирди.

Эми премьер-министрдин сөзү өтүмдүү боло баштайт. Мындан ары эгер Жогорку Кеңеш реалдуулуктан алыс бюджетти кабыл алса, өкмөт башчы аны президенттен чакыртып ала алат. (Буга чейин өлкө башчы бюджет тууралуу мыйзамга кол коюуга милдеттүү болчу). Премьер эми министрлерди оңой эле иштен алат. Ага президенттин кол коюусу кажет эмес, болгону фракция лидерлеринин макулдугу керек.

Ошондой эле эгер депутат премьер, биринчи вице-премьер болуп дайындалса, ал депутаттык мандатын сактап калат. Андан сырткары, коалициянын туруктуу болушуна жол ачылды. Эми фракция коалициядан чыгарын билдирсе, акыркы чечимди кабыл улууга фракциядагы депутаттардын үчтөн экисинин макулдугу керек. Чечим фракциянын токтому менен бекитилип, коалициядан чыгууну каалаган ар бир депутаттын колу коюлушу зарыл.