БИШКЕК, 3-окт. — Sputnik. Премьер-министр Сапар Исаков ИИМдин адистештирилген мамлекеттик күзөт кызмат башкармалыгынын жетекчисинин арызын кабыл алганын өкмөттүн маалымат кызматы Sputnik Кыргызстан агенттигине билдирди.
Талантбек Исаев ээлеген кызматынан агасы Жогорку Кеңештин депутаты Канат Исаев камакка алынгандан кийин өз каалоосу менен кетүү боюнча арыз жазган. ИИМден билдиришкендей, ал моралдык-этикалык абалдан улам ушундай кадамга барган.
Өкмөттөн маалымдашкандай, Исаевдин ордуна милициянын полковниги Улан Асанов дайындалды. Ал эмгек жамаатка шейшемби күнү тааныштырылат.
Канат Исаев эгер президенттикке талапкерлердин бирөө шайлоодо утулуп кала турган болсо массалык баш аламандык уюштуруп, бийликти басып алууга кам көрүп кээ бир тараптар менен сүйлөшүү жүргүзгөн деген кине менен кармалган.
