БИШКЕК, 5-сен. — Sputnik. Премьер-министр Сапар Исаков өзүнө кеңешчилерди дайындады. Бул туурасында өкмөттүн маалымат кызматы кабарлады.
Дүйшөмбү күнү Исаков Талант Султановду өзүнө кеңешчи кылып бекитүү туурасындагы документке кол койгон.
Султанов 1978-жылы туулган, 2016-жылы Гарвард университетин кесиптик билим берүү программасы боюнча аяктаган. 2006-жылы Колумбия университетинин финансы боюнча магистрлигин аяктаган. Ага чейин, 1999-жылы Сан-Франциско жогорку окуу жайынан бакалавр деңгээлин артыкчылык менен бүткөн.
Ал эми шейшемби күнү Эсенкул Момункулов дагы бир кеңешчиси болуп дайындалды.
Момункулов 1978-жылы туулган. 2008-жылы Германиядагы Гейдельберг университетин аяктап, андан соң, 2012-жылы Миннесота университетинин илимий изилдөөчүсү болгон.
Буга чейин өкмөттүн аппаратынын аймактык башкаруу жана уюштуруучулук-инспектордук бөлүмүнүн эксперти болуп иштеген (2011). КР президентинин аппаратындагы кадр иштери, аны менен катар эле мамлекеттик жана аймактык башкаруу боюнча инспектору болгон (2013). Ал эми 2015-жылы өкмөттүн аппаратынын жетекчисинин кеңешчиси болгон.
