БИШКЕК, 22-авг. — Sputnik. Жогорку Кеңеш жаңы өкмөттү түзүү үчүн 25-августта чукул жыйынга чогулат. Бул тууралуу өлкө башчынын маалымат кызматы билдирди.
Бүгүн президент парламенттеги көпчүлүк коалицияга кирген КСДП, "Кыргызстан" жана "Бир Бол" фракцияларынын лидерлери — Иса Өмүркулов, Алмазбек Батырбеков жана Алтынбек Сулаймановдор менен жолукту.
Президент өз сөзүндө алдыда боло турчу президенттик шайлоону эске алып, кыска мөөнөттүн ичинде өкмөттүн жаңы курамын бекитүү керектигин баса белгиледи.
"Ушундан улам мен Жогорку Кеңештин төрагасы Чыныбай Турсунбековго 25-августта парламенттин кезексиз жыйынын өткөрүү боюнча кат жолдодум", — деди Атамбаев.
Өлкө башчысы ошондой эле жаңы өкмөттүн алдында президенттик шайлоону өткөрүүдөн тышкары кышка даярдык көрүү сыяктуу маанилүү маселе турганын айтты.
Белгилей кетсек, президенттик шайлоо 15-октябрга дайындалган. Азыр Боршайкомдон үч талапкер — Темир Сариев, Өмүрбек Бабанов жана Сооронбай Жээнбеков расмий түрдө президенттикке талапкер катары каттоодон өттү.
