БИШКЕК, 13-фев. — Sputnik. Мамлекеттик каттоо кызматынын төрагасы Тайырбек Сарпашевди кызматынан бошотуу тууралуу Башкы прокуратуранын сунуштамасын кароо үчүн ведомстволор аралык комиссия түзүлдү. Бул тууралуу өкмөттүн маалымат кызматы билдирди.
Белгилей кетсек, Башкы прокуратура Мамлекеттик каттоо кызматынын жетекчиси Тайырбек Сарпашевди Максим Бакиевдин ишенимдүү адамы Ульяна Пакка тиешелүү кыймылсыз мүлктү камактан чыгарууга буйрук берген деп айыптап, аны кызмат ордунан алуу боюнча өкмөт башчыга сунуш жөнөткөн.
"Ведомстволор аралык жумушчу комиссия бир айлык мөөнөт ичинде Башкы прокуратуранын сунуштамасын карап чыгып, премьер-министрге тиешелүү сунуш берүү тапшырылды", — деп айтылат маалыматта.
Аталган жумушчу комиссиянын төрагасы болуп вице-премьер министр Жеңиш Разаков дайындалды. Анын курамына соттук өкүлчүлүк борборунун, Мамлекеттик улуттук коопсуздук кызматынын, Юстиция министрлигинин, өкмөттүн алдындагы экономикалык кылмыштуулукка каршы күрөшүү боюнча мамлекеттик кызматынын жана өкмөт аппаратынын өкүлдөрү кирди.
