БИШКЕК, 9-янв. — Sputnik. Бишкектин чок ортосунда жол кырсыгына кабылган маршрутка даракты сүзүп токтоду.
Кырсыктын видеосу "Короче" Telegram каналына жарыяланды. Кадрдан жол четиндеги тосмолор талкаланып, бус даракты сүзүп алганын көрүүгө болот. Андан соң ичинен жүргүнчүлөр түшө баштаган.
Бишкектин Кайгуул милиция кызматы Sputnik Кыргызстанга окуя 8-январда болжол менен саат 10.30дарда Байтик баатыр менен Горький көчөлөрүнүн кесилишинде болгонун билдирди. Кырсыкка айдоочунун рулга ээ боло албай калганы себеп болгону айтылат.
Мунун кесепетинен 67 жаштагы аял жана 14 жаштагы кыз башынан жаракат алып, ооруканага түшкөн.
Маршрутка айып короого киргизилип, тергөө иштери жүрүп жатат.
