БИШКЕК, 1-дек. — Sputnik. ИИМдин тергөө кызматы юрист Нурбек Токтакунов тарабынан жарыяланган материал боюнча тергөөгө чейинки териштирүү иштерин жүргүзүп жатат.
Эскерте кетсек, 15-ноябрь күнү Токтакунов КСДПнын 2017-жылы өткөн президенттик шайлоого кеткен чыгымы делген документтин көчүрмөсүн жарыялаган. Microsoft Excel файлында Жээнбековдун штабы тарабынан коротулду деп божомолдонгон сумма — 1 миллиардан ашуун сом көрсөтүлгөн. Бул мыйзам жол берген чыгымдан кыйла көп акча. Талапкердин шайлоо фондусунун жалпы чыгымы 165 миллион сомдон ашпашы керек. Ошол эле документте акча жумшалган иш-чараларга катышкан саясатчылардын, партия мүчөлөрүнүн аты-жөнү да көрсөтүлгөн.
КСДП президенттикке жалгыз Сооронбай Жээнбековдун талапкерлигин алып чыккан.
