БИШКЕК, 25-авг. — Sputnik. Токмок шаарында өтүп жаткан кикбокс боюнча мелдеште 14 жаштагы бала өзүн жаман сезип, андан соң жан берген. Бул маалыматты Sputnik Кыргызстан маалымат агенттигине Кикбокс федерациясынын президенти Александр Воинов тастыктады.
Анын айтымында, окуя 19-августта болгон.
"Каза болгон бала Оштон келген. Рефери мелдешти 15 секунддан кийин эле токтоткон. Себеби өспүрүм өзүн жаман сезе баштаган, андан ары тез жардам кызматы келип жардам көрсөткөн, бирок бала ага карабай көз жумган. Белгилей кетсек, атаандашы тараптан эч кандай сокку болгон эмес, тескерисинче ал алдыда болчу. Беттешке чейин дарыгерлер текшергенде саламаттыгы дурус эле. Көп өтпөй медиктер мээсине кан куюлуп кеткенин айтышты", — деди Воинов.
Ошондой эле Воинов өспүрүмдүн атасы федерацияга эч кандай доо артпаганын жана милицияга арыз жазбаганын кошумчалады.
Ал эми Чүй облусунун ИИББ аталган маалыматты тактап жатканын билдирди.
