ОШ, 21-июн. – Sputnik. Ош шаарында бала бакчалардын биринде 26 жаштагы келин өзүнүн бир жаш 4 айлык баласын жаздык менен тумчуктурууга аракет жасаган. Наристе бала бакчанын кызматкерлери тарабынан куткарылган. Бул тууралуу шаардык милиция билдирди.
Маалыматка ылайык, кылмышка шектелген аял 48 саатка камакка алынды. Ага карата Кылмыш жаза кодексинин 28 жана 97-беренелеринин (адам өлтүрүүгө аракет жасоо жана адам өлтүрүү) негизинде кылмыш иши козголду. Окуя 19-июнь күнү болгон.
"Шектүү келин мындай кадамга турмуштук шарты себеп болгонун айтып берди. Ал уулун жалгыз тарбиялап келген. Жакындары каралашпай, күйөөсү менен ажырашып кеткенин, жокчулуктан кыйналганын жүйө келтирди. Аялдын баш коргоо чарасын бүгүн, 21-июнда, Ош шаардык соту карайт. Буга чейин келинге калаадагы "Ак жүрөк" кризистик борбору жардам берип келген", — деп айтылат билдирүүдө.
Учурда наристенин ден соолугу канааттандыраарлык. Ал шаардагы балдар үйлөрүнүн биринде дарыгер менен тарбиячылардын көзөмөлүндө экени айтылды.
Буга чейин үч жашар баласын депкир менен сабап өлтүргөн келиндин окуясы да төбө чачты тик тургузган.
