БИШКЕК, 26-окт. — Sputnik. Кылмышкердин колунан бычакталып каза болгон милиция кызматкери 25 жаштагы Уларбек Майрамбеков Биринчи Май райондук милициясынын криминалдык кызматында иштечү. Бул тууралуу Бишкек ШИИБдин маалымат кызматы билдирди.
Эске салсак, 26-октябрга караган түнү Бишкектин Бөкөнбаев жана Исанов көчөлөрүнүн кесилишинен анын сөөгү табылган.
"Окуя болордун мурунку күнү Уларбек өзүнүн өндүрүшүндөгү иштерди жана табелдик куралын тапшырып, үйлөнөрүн айтып эмгек өргүүсүнө чыгуу үчүн рапорт жазган. Иштен чыгып кесиптештерин Бишкектин ичиндеги бир жерге алып барууну суранып, ал жакта калган. Бир нече убакыттан кийин ал бычакталып каза болгону белгилүү болгон", — деп айтылат маалыматта.
Маркум милиционер Жалал-Абад облусунун Ноокен районундагы Масы айылында 1992-жылы төрөлгөн. 2014-жылы Россия ИИМ академиясын аяктаган. Ушул эле жылдан тарта КР ички иштер органдарында аймактык тестөөчү милиционер катары иштеп баштаган. Анын милициянын ага лейтенанты деген наамы бар.
Майрамбековдун сөөгү 27-октябрда кичи мекенинде жерге берилет.
