БИШКЕК, 4-апр. — Sputnik. Бишкек — Ош каттамындагы Tez Jet авиакомпаниясынын учагы техникалык мүчүлүштүктөрдөн улам кайра "Манас" аба бекетине конууга аргасыз болду. Бул тууралуу Sputnik Кыргызстан агенттигине аталган компаниядан кабарлашты.
Маалыматка ылайык, BAe 146 учагы 8:00дө абага көтөрүлүп, бирок 15 мүнөттөн кийин артка кайтып келген. Ал эми социалдык тармактын колдонуучулары учак авариялык конуу жасаганын жазып чыгышкан.
"Учак техникалык мүчүлүштүктөрдөн улам кайтып келди. Эч кандай авариялык конуу болгон жок. Ал эми жүргүнчүлөрдү башка компаниянын учагы алып кетет", — деп компаниянын өкүлдөрү маалымдашты.
BAe 146 — орточо көлөмдүү учагы Улуу Британияда жасалган. Ага 85 —100гө чейин жүргүнчү батат.
