БИШКЕК, 25-ноя. — Sputnik. Кыргызстандын аймагында Азиз Батукаев жок экенин Ички иштер министрлиги билдирди.
Социалдык тармакта криминалдык төбөл Азиз Батукаевге окшош кишинин "Манас" аэропортунун аймагынан тартылган сүрөтү жарыяланган.
"Бишкектеги "Манас" аэропортунан тартылган сүрөт анын архивинде болушу мүмкүн. Айрым ЖМКлар жазгандар бул сүрөт ал өлкөдөн чыгып кеткенге чейин тартылган", — деп ИИМдин маалымат кызматы билдирди.
Батукаев Нарын шаарындагы абакта кармалган болчу. 2013-жылдын апрель айында ден соолугуна байланыштуу дарыгерлердин чыгарган корутундусу боюнча Нарын шаардык соту аны мөөнөтүнөн мурда бошоткон. Абактан чыгары менен ал Грозный шаарына учуп кеткен.
"Мыйзамдагы ууру" делинген Батукаевдин бошотулушу боюнча катуу талаш-тартыш болуп, Жогорку Кеңештин депутаттарынын турган комиссия түзүлгөн. Комиссия Батукаевдин бошотулушу мыйзамсыз болгондугу тууралуу корутунду чыгарган. 2013-жылдын 30-апрелинде Нарын шаардык соту буга чейин чыгарган чечимин жокко чыгарган. 6-майда криминалдык топтун лидерине эл аралык издөө жарыяланган. Батукаев 2006-жылы Баңгизатты мыйзамсыз сактоо, жарылуучу заттарды жана курал жаракты мыйзамсыз алып жүрүү, массалык баш-аламандык уюштуруу боюнча айыпталып, 16 жылга эркинен ажыратылган. Ал жаза мөөнөтүн өтөөдөн 9 жыл эрте бошотулган болчу.
