БИШКЕК, 28-апр. — Sputnik. Тышкы иштер министрлиги Евробиримдиктин Россияга каршы санкцияларынын 20-пакетине кыргыз компанияларынын киргизилишин өкүнүч менен кабыл алганын билдирди.
Ведомство белгилегендей, европалык өнөктөштөр менен туруктуу диалогго, сапарларга жана талап кылынган бардык маалыматтар берилгенине карабастан, кыргыз тараптын позициясы эске алынган эмес.
ТИМ мындай бир тараптуу кадамдар ишенимге доо кетирерин жана ЕБдин Кыргызстан, жалпы эле Борбор Азия өлкөлөрү менен кызматташтыкты өнүктүрүү тууралуу сөзүнө каршы келерин белгиледи. Кыргыз тарап үчүнчү өлкөлөргө карата бир тараптуу чектөө чараларын колдонуу практикасына тынчсыздануусун билдирди.
Бишкек Евробиримдикти республиканын кызыкчылыктарын эске алуу менен конструктивдүү диалогго чакырат.
Белгилей кетсек, Европа биримдиги Кыргызстанды Россияга каршы санкцияларды айланып өтүү коркунучу бар өлкөлөрдүн катарына киргизип, көзөмөлдү күчөткөн атайын механизмди ишке киргизген. Санкциялардын 20-пакетинин алкагында айрым жабдууларды (мисалы, станоктор, роутерлер, радиостанциялар) Кыргызстанга экспорттоого чектөө коюлган.