БИШКЕК, 2-авг. — Sputnik. Буга чейин социалдык тармакка Таласта 10 жашар бала кароосуз калды деген видео тараган. Президентттин облустагы өкүлчүлүгү жергиликтүү бийлик баланын жашоо шартын текшергенин билдирди.
Маалыматка ылайык, 10 жашар Б. Н. 64 жаштагы өгөй атасынын колунда тарбияланат. Апасы үчүнчү баласын төрөп төрөтканада болгондугуна байланыштуу өгөй атасы эки жана бир жаштагы балдарын карап үйүндө. 34 жаштагы апасы үй кожойкеси.
Б. Н. учурда Көк-Дөбө участкасында жайгашкан сарайда таенеси менен биргеликте өздөрүнүн малын багып жүрөт. Ал Арчагул айылындагы мектепте окуйт, класс жетекчиси бала сабактан калбай окуганын айткан.
Талас облустук администрация үй-бүлөнүн жашоо шарты орто экенин кошумчалады. Бул үй-бүлөнүн 53 кою, эки ую жана төрт торпогу бар. Көк-Дөбө участкасында жайгашкан сарай өспүрүмдүн өгөй атасынын менчигинде.
"Б.Н. ата-энеси тарабынан эч кандай зомбулук көрсөтүлбөгөндүгүн жана малды үй-бүлөсүнө жардам кылуу үчүн өз ыктыяры менен багып жатканын билдирди. Бул маселе боюнча түзүлгөн комиссия атасына түшүндүрүү иштерин жүргүзүп, РИИБ тарабынан тергөө жүргүзүлүүдө. Мындан сырткары, тиешелүү райондук мекеме-уюмдардын жетекчилерине, айыл аймак башчыларына үй-бүлөнү такай көзөмөлгө алуу тапшырылды", – деп айтылат маалыматта.