Учурда көп ата-энелер сыртта миграцияда жүргөндүктөн баласы каалаган сумманы которуп, айтканын аткарышат. Жакын туугандарынын колунда жүргөн окуучулардын өзү билемдикке барган учурлары да катталат. Бул тууралуу Кылым Сыдыкназарова Sputnik Кыргызстан радиосуна маек куруп жатып билдирди.
Анын айтымында, жеке менчик мектептерде да акча чогултууга тыюу салынган.
"Жыл сайын министрликтен акыркы коңгуроо салтанаттуу иш-чарасын өткөрүү жөнүндө буйрук чыгат. Бул буйрукта эң биринчи окуучулардын өмүрүнүн коопсуздугу каралат. Акыркы коңгуроо аземи эртең менен саат 9:00дө башталып, 12:00дө аяктайт. Андан кийин ар бир окуучу мектеби, мугалимдери менен коштошуп, классташтар өз алдынча бир аз майрамдашып, анан ата-энелери алып кетет. Буйрукта ушул аралыкта кандайдыр бир кырсык болсо, анда мектеп жооптуу болору жазылган. Ал эми ата-энеси алып кеткенден кийин өздөрүнчө уюшуп, акыркы коңгуроону белгилеп жатып мектептен тышкары кырсык болсо ата-эне жооп берет. Мамлекеттик жана жеке менчик мектептерде акча чогултууга тыюу салынган. Айрым ата-энелер өз ара майрам уюштуруп алышат. Ушул ата-энелерден коопсуздукту ойлоп, бүтүрүү аземинде балдарды жакшылап карап, келе жаткан экзамендерге алардын мыкты даярдануусуна шарт түзүп беришин сурайт элем. Бирок бейбаштык мурункуга караганда дээрлик азайды. Бир кездерде ата-энесинин унаасын түндө айдап кетип, жолдо кырсыктаган бүтүрүүчүлөр да болгон", — деди Сыдыкназарова.
Ал 25-майда укук коргоо кызматкерлери да күнү-түнү коопсуздукту көзөмөлдөшөрүн кошумчалады.