БИШКЕК, 12-май — Sputnik. Австриянын мурдагы тышкы иштер министри Карин Кнайсль RT телеканалына берген маегинде Россия газына жарыяланчу эмбарго Германияны өтө оор абалга кептейт деген оюн билдирди.
Анын айтымында, мындай пикирди Германиянын Борбордук банкы жана ири ишканалардын жетекчилери деле колдошот.
"Борбордук банктын өкүлдөрү этият позицияны карманышат. Алар газдын импортуна толук эмбарго киргизүүдөн биринчи кезекте өндүрүш тармагы жапа чегет деп айтууда", — деди Кнайссль.
Дипломат Россиянын көгүлтүр отун алуудан баш тартуу химия тармагындагы ишканалардын жумушчуларынын массалык түрдө ишсиз калышына алып келет деп эсептейт.
"BASF химиялык концерни сыяктуу ири өнөр жай ишканаларынын жетекчилери "биз муну менен күрөшө албайбыз, өтө оор күндөр келе жатат" деп айтууда", — деди экс-министр.
1-апрелден тарта Россия Европа өлкөлөрүнөн газдын акысын рубль менен гана ала баштаган. Импорттоочу "Газпромбанктан" атайын эсеп ачууга тийиш, ага келишимде көрсөтүлгөн валютада акча которот. Банк бул валютаны Москва биржасында сатат жана газды сатып алуучунун эсебине рублди чегерип берет.
Еврокомиссия март айында Евробиримдик үчүн 2022-жылы Россия газына болгон суроо-талапты үчтөн экиге, башкача айтканда, болжол менен 100 миллиард куб метрге кыскарта турган атайын планды иштеп чыгууну сунуштаган. Еврокомиссиянын башчысы Урсула фон дер Лейен өткөн аптада Россияга каршы санкциялардын алтынчы пакетинин алкагында Россия мунайына этап-этабы менен тыюу салууну сунуштай турганын билдирген.