БИШКЕК, 6-май — Sputnik. Кыргызстандын Сауд Аравиядагы элчиси Улукбек Марипов Медина шаарында жашаган КР жарандары жана студенттери менен жолукту. Бул тууралуу Тышкы иштер министрлиги билдирди.
Кыргызстандын Сауд Аравиядагы элчиси Улукбек Марипов Медина шаарында жашаган КР жарандары жана студенттери менен жолугушту
© Фото / пресс-служба МИД КР
Анда элчи кыргыз бийлиги тарабынан социалдык-экономикалык абалды өнүктүрүү боюнча көрүлүп жаткан чаралар, ошондой эле билим берүү жана жаштарды колдоо боюнча мамлекеттик саясат тууралуу маалымат берген.
Аны менен катар мекендештер үчүн кошумча ыңгайлуу шарттарды түзүү үчүн көмөк көрсөтүүгө даяр экендигин билдирип, аларды элчилик уюштурган ар кандай иш-чараларга активдүү катышууга чакырган.
Мындан сырткары, Марипов ажылыкты уюштуруу жаатындагы кырдаал менен таанышуу максатында кыргызстандык зыяратчылар жана ажылык сапарды уюштуруучу ата мекендик компаниялардын өкүлдөрү менен өзүнчө жолугушкан.
ТИМдин маалыматына ылайык, Сауд Аравияда Кыргызстандын 600гө жакын жараны жашайт, анын ичинен 230дан ашыгы студенттер жана алардын үй-бүлөлөрү. Студенттердин негизги бөлүгү Меккедеги белгилүү "Умм аль-Кура", Мединадагы "Ислам университети", Эр-Рияддагы "Малик" жана "Имам" университеттеринде билим алышат.