БИШКЕК, 26-май — Sputnik. Кошумча нарк салыгынан бошотуу баалардын төмөндөшүнө таасир эте албаса, жеңилдиктерди берүүнүн кажети барбы? Актуалдуу болуп жаткан мындай маселени министрлер кабинетинин төрагасы Улукбек Марипов өкмөттүн жыйынында көтөргөн.
Министрлер кабинетинин маалымат кызматынын билдиргенине караганда, кошумча нарк салыгынан (КНС) бошотулган дары-дармек каражаттарынын жана медициналык буюмдардын тизмесин талкуулоо боюнча кеңешме өттү.
"Биздин негизги милдеттерибиздин бири – калкты дары-дармек менен жеткиликтүү баада камсыздоо. Салыктык жеңилдиктин айынан республикалык бюджет жыл сайын 25 миллиард сомго чейин жоготууда. Дары-дармек каражаттарына белгилүү жеңилдиктер болушу керек. Негизги товарлар Россиядан келет, бирок андагы жана бул жердеги бааларды салыштыра келгенде айырма чоң. Жеткирүүчүлөр жана дарыкана тармагы акча табышат, ал эми карапайым калк кыйналууда. Эгерде КНС төлөөдөн бошотуу баалардын төмөндөшүнө таасир эте албаса, жеңилдиктерди берүү режимин пайдалануунун кажети барбы", — деп суроо салган Марипов.
Министрлер кабинетинин башчысы КНСтен бошотулган дары-дармектердин жана медициналык буюмдардын жаңы тизмесин аныктоо маанилүү экендигин баса белгилеген.
КНСтен бошотулган дары-дармек каражаттарынын жана медициналык буюмдардын тизмеси 2013-жылы бекитилген.
"Тизмеде жашоо үчүн маанилүү дары-дармектерди гана калтырып, калгандары үчүн КНС киргизүүнү сунуштайм. Кеңешмелерде талкуу жүрүп жатканы менен жаңы аны аныктай албай келебиз. Эгерде кийинки кеңешмеге себептери негизделген жаңы тизме даяр болбосо, анда көптөгөн жетекчилер менен коштошууга аргасыз болобуз. Антпесе бул узакка созулуп, дары-дармекти жеткиликтүү баада сатып ала албаган катардагы жарандар жапа чегип калат", — деген Марипов.
Маалымат кызматынан кошумча нарк салыгынан бошотулган дарылар менен медициналык буюмдардын саны 161ге жеткенин билдиришти.